ग्राम पंचायत सौंदड भवनात नवचैतन्याचे दिवे पेटले ,सरपंच हर्ष मोदी यांचे स्तुत्य उपक्रम

सडक अर्जुनी –आज लक्ष्मीपूजनाच्या शुभदिनी ग्राम पंचायत सौंदड येथे दुसऱ्यांदा दिवाळी उत्साहात साजरी करण्यात आली. संपूर्ण इमारतीवर आकर्षक रोषणाई करण्यात आली होती आणि गावातील नागरिकांनी एकत्र येऊन दीपप्रज्वलन करून सणाचा आनंद द्विगुणित केला. धन, ऐश्वर्य, आणि समृद्धीचे प्रतीक असलेल्या लक्ष्मी मातेची पूजा मोठ्या उत्साहात पार पडली.

हा दुसरा असा प्रसंग होता, जिथे ग्राम पंचायत सौंदडने लक्ष्मीपूजनाचे आयोजन केले, ज्यामुळे पंचक्रोशीत हा उपक्रम चर्चेचा विषय ठरला आहे. या उत्सवी प्रसंगी सरपंच हर्ष मोदी यांनी सर्व नागरिकांना शुभेच्छा देत, यश, समृद्धी, आणि सुखशांती लाभो अशी मनोभावे प्रार्थना केली. या स्तुत्य उपक्रमामुळे ग्रामस्थांमध्ये नवीन उत्साहाचे आणि एकतेचे वातावरण निर्माण झाले आहे. सरपंच हर्ष मोदी यांनी ग्रामस्थांना एकत्र आणून एकात्मतेचा संदेश दिला आणि गावाच्या प्रगतीसाठी अशा उपक्रमांचे महत्त्व अधोरेखित केले.

या कार्यक्रमाला पंचायत समिती सदस्य, सरपंच, उपसरपंच, ग्राम पंचायत सदस्य, कर्मचारी आणि गावातील नागरिक मोठ्या संख्येने उपस्थित होते. सर्वांनी एकत्र येऊन लक्ष्मीपूजनाचा आनंद घेतला आणि एकमेकांना दिवाळीच्या शुभेच्छा दिल्या. या प्रसंगी उपस्थित मान्यवरांनी गावाच्या प्रगतीसाठी सहकार्य, एकता आणि एकात्मतेचा संदेश दिला. सर्वांनी सरपंच हर्ष मोदी यांच्या या उपक्रमाचे कौतुक केले, ज्यामुळे ग्रामस्थांमध्ये एक नवीन चैतन्य निर्माण झाले आहे.