22 एप्रिल ते 6 मे पर्यंत जिल्ह्यात मनाई आदेश लागू

 गोंदिया : पोलीस अधीक्षक गोंदिया कार्यालयाचे 15 एप्रिल 2024 चे पत्रानुसार दिनांक 22 एप्रिल ते 6 मे 2024 या कालावधीत जिल्ह्यात विविध पक्ष व संघटनांकडून त्यांच्या प्रलंबीत मागण्या संदर्भाने उपोषणे, धरणे, मोर्चे, रास्तो रोको, जेल भरो व संप इत्यादी आंदोलने आयोजित केली जात आहेत.

तसेच 23 एप्रिल रोजी हनुमान जयंती व 1 मे रोजी महाराष्ट्र दिन साजरा होणार असल्यामुळे जिल्ह्यात कायदा व सुव्यवस्था अबाधित राखण्याच्या दृष्टीने अतिरिक्त जिल्हादंडाधिकारी, गोंदिया यांना प्राप्त अधिकाराअंतर्गत सन 1951 च्या मुंबई पोलीस अधिनियम क्रमांक 22 चे कलम 37 (1) (3) अन्वये दिनांक 22 एप्रिल पासून ते 6 मे 2024 पर्यंत अतिरिक्त जिल्हादंडाधिकारी विजया बनकर यांनी जिल्ह्यात मनाई आदेश लागू केले आहे. सदर अधिसूचनेतील कोणत्याही शर्तीचे उल्लंघन झाल्यास संबंधितांवर फौजदारी नियमाअंतर्गत योग्य ती कार्यवाही करण्यात येईल.